श्री रवि सप्तति रहस्यनाम स्तोत्रम्

॥ श्री रवि सप्तति रहस्यनाम स्तोत्रम् ॥ ॥ स्कन्दपुराणे काशीखण्डे नवमोऽध्याये ॥ हंसो भानुः सहस्रांशुस्तपनस्तापनो रविः । विकर्तनो विवस्वांश्च विश्वकर्मा विभावसुः ॥ १ ॥ विश्वरूपो विश्वकर्ता मार्तण्डो मिहिरोऽम्शुमान् । आदित्यश्चोष्णगुः सूर्योऽर्यमा ब्रध्नो दिवाकरः ॥ २ ॥ द्वादशात्मा सप्तहयो भास्करो हस्करः खगः । सूरः प्रभाकरः श्रीमान् लोकचक्षुर्ग्रहेश्वरः ॥ ३ ॥ त्रिलोकेशो लोकसाक्षी तमोऽरिः शाश्वतः शुचिः । गभस्तिहस्तस्तीव्रांशुस्तरणिः सुमहोरणिः ॥ ४ ॥ द्युमणिर्हरिदश्वोऽर्को भानुमान् भयनाशनः । छन्दोश्वो वेदवेद्यश्च भास्वान् पूषा वृषाकपिः ॥ ५ ॥ एकचक्ररथो मित्रो मन्देहारिस्तमिस्रहा । दैत्यहा पापहर्ता च धर्मो धर्मप्रकाशकः ॥ ६ ॥ हेलिकश्चित्रभानुश्च कलिघ्नस्तार्क्ष्यवाहनः । दिक्पतिः पद्मनीनाथः कुशेशयकरो हरिः ॥ ७ ॥ घर्मरश्मिर्दुर्निरीक्ष्यश्चण्डांशुः कश्यपात्मजः । एभिः सप्ततिसङ्ख्याकैः पुण्यैः सूर्यस्य नामभिः ॥ ८ ॥ प्रणवादि चतुर्थ्यन्तैर्नमस्कारसमन्वितैः । प्रत्येकमुच्चरन्नाम दृष्ट्वादृष्ट्वा दिवाकरम् ॥ ९ ॥ विगृह्य पाणियुग्मेन ताम्रपात्रं सुनिर्मलम् । जानुभ्यामवनिं गत्वा परिपूर्य जलेन च ॥ १० ॥ करवीरादि कुसुमै रक्तचन्दनमिश्रितैः । दूर्वाङ्कुरैरक्षतैश्च निक्षिप्तैः पात्रमध्यतः ॥ ११ ॥ दद्यादर्घ्यमनर्घ्याय सवित्रे ध्यानपूर्वकम् । उपमौलिं समानीय तत्पात्रं नान्यदृङ्मनाः ॥ १२ ॥ प्रतिमन्त्रं नमस्कुर्यादुदयास्तमये रविम् । अनया नामसप्तत्या महामन्त्ररहस्यया ॥ १३ ॥ एवं कुर्वन्नरो जातु न दरिद्रो न दुःखभाक् । व्याधिभिर्मुच्यते घोरैरपिजन्मान्तरार्जितैः ॥ १४ ॥ विनौषधैर्विना वैद्यैर्विनापथ्यपरिग्रहैः । कालेन निधनं प्राप्तः सूर्यलोके महीयते ॥ १५ ॥ ॥ इति स्कन्दपुराणे काशीखण्डे नवमोऽध्याये श्री सूर्य सप्ततिनाम स्तोत्रम् सम्पूर्णम् ॥