श्री सङ्कष्टमोचन स्तोत्रम् (काशी पीठाधीश्वर कृत)

॥ śrīsaṅkaṣṭamōcanastōtram ॥

kāśīpīṭhādhīśvara jagadguruśaṅkarācāryasvāmi śrīmahēśvarānandasarasvatīviracitaṁ (By Swami Shri Maheshvarananda Saraswati)

sindūrapūrarucirō balavīryasindhuḥ buddhiprabhāvanidhiradbhutavaibhavaśrīḥ । dīnārtidāvadahanō varadō varēṇyaḥ saṅkaṣṭamōcanavibhustanutāṁ śubhaṁ naḥ ॥ 1॥

sōtsāhalaṅghitamahārṇavapauruṣaśrīḥ laṅkāpurīpradahanaprathitaprabhāvaḥ । ghōrāhavapramathitāricayapravīraḥ prābhañjanirjayati markaṭasārvabhaumaḥ ॥ 2॥

drōṇācalānayanavarṇitabhavyabhūtiḥ śrīrāmalakṣmaṇasahāyakacakravartī । kāśīsthadakṣiṇavirājitasaudhamallaḥ śrīmārutirvijayatē bhagavān mahēśaḥ ॥ 3॥

nūnaṁ smr̥tō'pi dadatē bhajatāṁ kapīndraḥ sampūjitō diśati vāñchita-siddhivr̥ddhim । saṁmōdakapriya upaiti paraṁ praharṣaṁ rāmāyaṇāśravaṇataḥ paṭhatāṁ śaraṇyaḥ ॥ 4॥

śrībhāratapravarayuddharathōddhataśrīḥ pārthaikakētanakarālavāśālamūrtiḥ । uccairghanāghanaghaṭāvikaṭāṭṭahāsaḥ śrīkr̥ṣṇapakṣabharaṇaḥ śaraṇaṁ mamā'stu ॥ 5॥

jaṅghālajaṅgha upamātividūravēgō muṣṭiprahāraparimūrcchitarākṣasēndraḥ । śrīrāmakīrtitaparākramaṇōddhavaśrīḥ prākampanirvibhuruḍañcatu bhūtayē naḥ ॥ 6॥

sītārtidāraṇapaṭuḥ prabalaḥ pratāpī śrīrāghavēndraparirambhavaraprasādaḥ । varṇīśvaraḥ savidhiśikṣitakālanēmiḥ pañcānanō'panayatāṁ vipadō'dhidēśam ॥ 7॥

udyadbhanusahasrasannibhatanuḥ pītāmbarālaṅkr̥taḥ prōjjvālānaladīpyamānanayanō niṣpiṣṭarakṣōgaṇaḥ । saṁvartōdyatavāridōddhataravaḥ prōccairgadāvibhramaḥ śrīmān mārutanandanaḥ pratidinaṁ dhyēyō vipadbhañjanaḥ ॥ 8॥

rakṣaḥpiśācabhayanāśanamāmayādhi prōccairjvarāpaharaṇaṁ hananaṁ ripūṇām । sampattiputrakaraṇaṁ vijayapradānaṁ saṅkaṣṭamōcanavibhōḥ stavanaṁ narāṇām ॥ 9॥

dāridryaduḥkhadahanaṁ śamanaṁ vivādē kalyāṇasādhanamamaṅgalavāraṇāya । dāmpatyadīrghasukhasarvamanōrathāptiṁ śrīmārutēḥ stavaśatāvr̥tirātanōti ॥ 10॥

stōtraṁ ya ētadanuvāsaramāptakāmaḥ śrīmārutiṁ samanucintya paṭhēt sudhīraḥ । tasmai prasādasumukhō varavānarēndraḥ sākṣātkr̥tō bhavati śāśvatikaḥ sahāyaḥ ॥ 11॥

saṅkaṣṭamōcanastōtraṁ śaṅkarācāryabhikṣuṇā । mahēśvarēṇa racitaṁ mārutēścaraṇē'rpitam ॥ 12॥