हनुमत्प्रसादस्तोत्रम् (भैरोजी रंगनाथ कृत)

॥ hanumatprasādastōtram ॥

vilāsō vaidēhīhr̥dayakamalōnmīlanakalā- vidagdhō vācāṁ yaḥ samabhavadaśōkāvanitalē । pramādyallaṅkēśasmayavidalanōddāmamahimā sa dadyādasmākaṁ surabhiriha vācāṁ madhuratām ॥ 1॥ tviṣāmīśaṁ dēvaṁ viyati samudañcatsvakiraṇaṁ suradrōrmanvānaḥ phalamiti parīpākamadhuram । grahītuṁ taṁ māturbahiravatarannēva jaṭharāt samudyuktō yō'bhūt sa vitaratu ghāṭīṁ mama girām ॥ 2॥ turāsāhi stōkaṁ racitavati yasminnavinayaṁ vitanvantaṁ stabdhaṁ badhiramavaśaṁ lōkamakhilam । samādhātuṁ kl̥ptaṁ kati kati samīraṁ stutigiraḥ samantādvaidhātryō divi samuditā naḥ sa śaraṇam ॥ 3॥ tapastaptvā tīvraṁ jagati śaradāṁ yacchatamahō surāṇāṁ sarvēṣāṁ samabhilaṣitaṁ cāpyasulabham । tadasmin brahmāstraṁ samajani yayā kuṇṭhitabalaṁ namastasyai śaktyai praṇatajanagatyai bhavatu mē ॥ 4॥ purastādullōlōccaladalaghuvīcītaralitaṁ payōdhiṁ saṁvīkṣya drutagalitadhairyē kapikulē । jajr̥mbhē gambhīrā tanuradhimahēndrakṣitidharaṁ yadīyā divyā sā bhavatu mama bhavyāya mahatē ॥ 5॥ mahāvēgē tasmin tarati jaladhiṁ sāhyavidhayē samāyātāḥ kēcinna parigaṇitāḥ kāryavaśataḥ । vinaśyadviśvāsē maraṇaśaraṇē durgatajanē sukhaṁ vā duḥkhaṁ vā kimu kalayatē kāryaparatā ॥ 6॥ gabhīraprōnmīlannatavalitanābhīvilasitaṁ madōdyallōlambadyutirucirarōmāvaliyutam । samunmīlatsāndratrivalijitagaṅgāmbulalitaṁ natāṅgīvr̥ndaṁ kō bhavati vimukhō vīkṣya yadr̥tē ॥ 7॥ sphuṭanmallīmālākalitakabarībhārarucirāḥ samañcadvakṣōjadvayavihatakōkīmadabharāḥ । samr̥dhyattāruṇyā niśi vivasanā vīkṣya yuvatī- rvinā taṁ dhīrāgryaṁ jagati gaṇayēt tucchamiha kaḥ ॥ 8॥ trilōkīkalyāṇī triṣavaṇaparāṇāmabhimatā trayīvēdyā stutyā tridaśapatisantrāṇanipuṇā । didīpē śākhēva kṣitinipatitā prōnnatatarō- raśōkōdyānē yannayanasubhagā dīptikalikā ॥ 9॥ dayāsāradrōṇī daradalitapaṅkēruharuciḥ śarajjyōtsnādhārā śamadhanajanānandajananī । aśōkōdyānē'rciḥkalitakaruṇī kāpi rurucē yadagrē kalyāṇī kalayatu sa naḥ kāmitamiha ॥ 10॥ viluptē viśvāsē vigatavati dhairyē drumatalē nirūpābhirhaṁhō vinayarahitābhiḥ parivr̥tau । nidēśē yō bhāvaḥ samajani rahō bhūṣaṇavarē cirād dr̥ṣṭē dēvyā tamanugadituṁ kō nu caturaḥ ॥ 11॥ paṭīyān pāthōdhēḥ salilamakhilaṁ śōṣakalilaṁ vidhātuṁ laṅkāṁ vā bhasitakaluṣāṁ mārutasakhaḥ । yadīyaṁ vālāgraṁ svayamadhigatō nādahadahō sa mē dēvō hārdaṁ vyapanayatu gāḍhāndhatamasam ॥ 12॥ samutsāhaṁ brūmaḥ kathamiva kapīnāṁ yaduditē samutkaṇṭhā sarvaṅkaṣapaṭuni gambhīravacasi । ahō dr̥ṣṭā sītētyamr̥tarasaniṣyandamadhurē niṣōdadbālānāmiva sa jayatānmātr̥vacanē ॥ 13॥ yadānītē sāndrasphuradanupamānandalaharī yathā dhēnōrvatsē'sravadiva jaganmūrtihr̥dayē । sa dēvīmūrdhālaṅkaraṇamahitē dr̥ṣṭiviṣayē maṇau syānmē bhūtyai praṇatajanacintāmaṇivarē ॥ 14॥ jayatu jayatu ramyaṁ brahmacaryasya bhāgyaṁ jayatu jayatu dēvyā añjanāyāśca bhāgyam । jayatu ca raghuvīrē bhaktimadbhāgadhēyaṁ jayatu viśaraṇānāṁ paktrimaṁ bhāgadhēyam ॥ 15॥ bhairōjīraṅganāthēna kr̥taṁ stōtraṁ hanūmataḥ । bhūyād bhūtyai rasavidāṁ bhaktibhājāṁ hanūmati ॥ 16॥ ॥ iti bhairajīraṅganāthakr̥taṁ śrīhanumatprasādastōtraṁ sampūrṇam ॥