श्रीहनुमदष्टोत्तरशतनामस्तोत्रम् (पाञ्चरात्रागमतः)

॥ śrīhanumadaṣṭōttaraśatanāmastōtram ॥

ōm rāmadāsāgraṇīḥ śrīmān hanūmān pavanātmajaḥ । āñjanēyaḥ kapiśrēṣṭhaḥ kēsarīpriyanandanaḥ ॥ 1॥ ārōpitāṁsayugalarāmarāmānujaḥ sudhīḥ । sugrīvasacivō vālijitasugrīvamālyadaḥ ॥ 2॥ rāmōpakāravismartr̥sugrīvasumatipradaḥ । sugrīvasatpakṣapātī rāmakāryasusādhakaḥ ॥ 3॥ mainākāślēṣakr̥nnāgajananījīvanapradaḥ । sarvadēvastutaḥ sarvadēvānandavivardhanaḥ ॥ 4॥ chāyāntramālādhārī ca chāyāgrahavibhēdakaḥ । sumērusumahākāyō gōṣpadīkr̥tavāridhiḥ ॥ 5॥ biḍālasadr̥śākārastaptatāmrasamānanaḥ । laṅkānibhañjanaḥ sītārāmamudrāṅgulīyadaḥ ॥ 6॥ rāmacēṣṭānusārēṇa cēṣṭākr̥dviśvamaṅgalaḥ । śrīrāmahr̥dayābhijñō niḥśēṣasurapūjitaḥ ॥ 7॥ aśōkavanasañcchēttā śiṁśupāvr̥kṣarakṣakaḥ । sarvarakṣōvināśārthaṁ kr̥takōlāhaladhvaniḥ ॥ 8॥ talaprahārataḥ kṣuṇṇabahukōṭiniśācaraḥ । pucchaghātaviniṣpiṣṭabahukōṭinarāśanaḥ ॥ 9॥ jambumālyantakaḥ sarvalōkāntarasutaḥ kapiḥ । svadēhaprāptapiṣṭāṅgadurgharṣābhidharākṣasaḥ ॥ 10॥ talacūrṇitayūpākṣō virūpākṣanibarhaṇaḥ । surāntarātmanaḥ putrō bhāsakarṇavināśakaḥ ॥ 11॥ adriśr̥ṅgaviniṣpiṣṭapraghasābhidharākṣasaḥ । daśāsyamantriputraghnaḥ pōthitākṣakumārakaḥ ॥ 12॥ suvañcitēndrajinmuktanānāśastrāstravr̥ṣṭikaḥ । indraśatruvinirmuktaśastrācālyasuvigrahaḥ ॥ 13॥ sukhēcchayēndrajinmuktabrahmāstravaśagaḥ kr̥tī । tr̥ṇīkr̥tēndrajitpūrvamahārākṣasayūthapaḥ ॥ 14॥ rāmavikramasatsindhustōtrakōpitarāvaṇaḥ । svapucchavahninirdagdhalaṅkālaṅkāpurēśvaraḥ ॥ 15॥ vahnyanirdagdhācchapucchaḥ punarlaṅghitavāridhiḥ । jaladaivatasūnuśca sarvavānarapūjitaḥ ॥ 16॥ santuṣṭaḥ kapibhiḥ sārdhaṁ sugrīvamadhubhakṣakaḥ । rāmapādārpitaśrīmaccūḍāmaṇiranākulaḥ ॥ 17॥ bhaktyākr̥tānēkarāmapraṇāmō vāyunandanaḥ । rāmāliṅganatuṣṭāṅgō rāmaprāṇapriyaḥ śuciḥ ॥ 18॥ rāmapādaikaniratavibhīṣaṇaparigrahaḥ । vibhīṣaṇaśriyaḥ kartā rāmalālitanītimān ॥ 19॥ vidrāvitēndraśatruśca lakṣmaṇaikayaśaḥpradaḥ । śilāprahāraniṣpiṣṭadhūmrākṣarathasārathiḥ ॥ 20॥ giriśr̥ṅgaviniṣpiṣṭadhūmrākṣō balavāridhiḥ । akampanaprāṇahartā pūrṇavijñānacidghanaḥ ॥ 21॥ raṇādhvarē kaṇṭharōdhamāritaikanikumbhakaḥ । narāntakarathacchēttā dēvāntakavināśakaḥ ॥ 22॥ mattākhyarākṣasacchēttā yud'dhōnmattanikr̥ntanaḥ । triśirōdhanuṣaścchēttā triśiraḥkhaḍgabhañjanaḥ ॥ 23॥ triśirōrathasaṁhārī triśirastriśirōharaḥ । rāvaṇōrasi niṣpiṣṭamuṣṭirdaityabhayaṅkaraḥ ॥ 24॥ vajrakalpamahāmuṣṭighātacūrṇitarāvaṇaḥ । aśēṣabhuvanādhārō lakṣmaṇōd'dharaṇakṣamaḥ ॥ 25॥ sugrīvaprāṇarakṣārthaṁ makṣikōpamavigrahaḥ । kumbhakarṇatriśūlaikasañchēttā viṣṇubhaktimān ॥ 26॥ nāgāstrāspr̥ṣṭasaddēhaḥ kumbhakarṇavimōhakaḥ । śastrāstrāspr̥ṣṭasaddēhaḥ sujñānī rāmasammataḥ ॥ 27॥ aśēṣakapirakṣārthamānītauṣadhiparvataḥ । swaśaktyā lakṣmaṇōd'dhartā lakṣmaṇōjjīvanapradaḥ ॥ 28॥ lakṣmaṇaprāṇarakṣārthamānītauṣadhiparvataḥ । tapaḥkr̥śāṅgabharatē rāmāgamanaśaṁsakaḥ ॥ 29॥ rāmastutasvamahimā sadā sandr̥ṣṭarāghavaḥ । rāmacchatradharō dēvō vēdāntapariniṣṭhitaḥ ॥ 30॥ mūlarāmāyaṇasudhāsamudrasnānatatparaḥ । badarīṣaṇḍamadhyasthanārāyaṇaniṣēvakaḥ ॥ 31॥ ॥ phalaśrutiḥ ॥ ityētacchrīhanūmatō nāmanamaṣṭōttaraṁ śatam । paṭhatāṁ śr̥ṇvatāṁ caiva nityamabhyasatāṁ satām ॥ 32॥ anantapuṇyaphaladaṁ mahāpātakanāśanam । mahārōgapraśamanaṁ mahāduḥkhavināśanam ॥ 33॥ dustarāpatpraśamanaṁ tāpatrayavināśanam । rāmakrōdhādiśamanaṁ bāhyaśatruvināśanam ॥ 34॥ anādyajñānaśamanaṁ saṁsārabhayanāśanam । mahābandhaharaṁ samyak karmabandhanikr̥ntanam ॥ 35॥ vādē vijayadaṁ nityaṁ raṇē śatruvināśanam । dhanadhānyapradaṁ samyak putrapautrapravardhanam ॥ 36॥ kimatra bahunōktēna mōkṣaikaphaladaṁ satām । pūrṇānugrahatō viṣṇōryō vāyurmōkṣadaḥ satām ॥ 37॥ tasya stōtrasya māhātmyaṁ kō'pi varṇayituṁ kṣamaḥ । śrutismr̥tipurāṇāni bhāratādyuktayastathā ॥ 38॥ asminnarthē pramāṇāni satyaṁ satyaṁ vadāmyaham । satyaṁ satyaṁ punaḥ satyaṁ nātra kāryā vicāraṇā ॥ 39॥ ॥ iti śrīhanumadaṣṭōttaraśatanāmastōtraṁ sampūrṇam ॥